Республика раҳбари, хусусан, глобал ўйинчилар коронавирус тарқалишидан келиб чиққан глобал инқироздан ўз мақсадлари учун фойдаланиши мумкин, деб ҳисоблайди. Лукашенконинг фикрига кўра, кўпчиликни аллақачон асосий масала ўйлантириб қўйган: COVID -19 пандемиясидан кейин нима бўлади.

"Аммо бу дунёнинг кучлилари урушсиз... шу "коронавирус психози", жумладан, инфодемия орқали дунёни қайта тақсимлаб олмоқчи бўлганга ўхшамайдими?", деди Лукашенко.

Шу билан бирга, у БМТнинг коронавирус билан курашиш учун дунё ялпи ички маҳсулотининг 10 фоизи миқдоридаги пулни босиб чиқариш таклифини эслади. Лукашенко бу "бўш пул" деб ҳисоблайди, чунки "доллар аста-секин қадрсизланиб бормоқда, шундан кейин инфляция кучаяди".

"Биз рубл билан қаерда бўлиб қолишимиз тушунарли. Бундан ташқари: бу триллионларни ким олади, улар кимда қолади? Бойлар бойиб, қашшоқлар камбағал бўлиб қолмайдими? Бизни тўхтатишимиз, ўтиришимиз ва бизда мавжуд бўлган жуда оз миқдордаги валюта захираларини еб битиришимизга ундашмоқчи. Биз уларни ҳатто Россияда ҳам жуда катта деб айта олмаймиз. Россия учун бу ҳеч нарса эмас – ўтириб еганда бир йилга ҳам етмайди. Биз билан ҳам худди шундай. ЯИМнинг 10% ини босиб чиқариб, "оёқда" турганлар келиб, бизга айтадилар: мана сизга озгина пул, лекин сиз айтганларимизни бажарасиз. Дунё мана шундай қилиб қайта тақсимланиши мумкин"- деди Лукашенко.

Унинг сўзларига кўра, бугунги кунда кўпчилик "пандемиядан кейин дунё бошқача бўлади" дейишади ва у шахсан бунга рози. "Аммо бу дунёда бизнинг жойимиз қаерда бўлади? Бу мен учун асосий савол. Коронапсикоз эмас, ахборот пандемияси эмас. Бу бор, лекин бир-икки ой ўтиб кетади. Бизнинг жойимиз қаерда деган савол қолади. Бундай савол ҳамма учун пайдо бўлади. Ресурсларга бой Қозоғистон, Туркманистон, Тожикистон учун ҳам, яна ҳам кўпроқ Арманистон ва Қирғизистон, Украина ва бугун Беларус Президентининг сиёсатини шубҳа остига олаётган Науседа (Литва Президенти Гитанас Науседа - таҳр.) учун ҳам. Бизни урушсиз тақсимлаб олишларидан қўрқаман" - деб қўшиб қўйди Лукашенко.

Президентнинг таъкидлашича, у Белорусияда COVID-19 шароитларида ҳам ишлаб чиқариш ишлаб туришини талаб қилмоқда, чунки у "пандемиядан кейин республикада нима бўлишидан хавотирда: агар кўпчилик, масалан: литваликлар, латвияликлар ва бошқалар каби тўхтаб қолса". "Улар тирик қоладилар. Россияда бугунги кунда бутун дунё муҳтож бўлган нефт ва газ бор. Хитойнинг иқтисодиётда улкан имкониятлари бор. Америкада пул босиб чиқарадиган машина бор: икки триллион ташланди, яна иккитаси йўлда", - дея қўшимча қилди Лукашенко.

Бутунжаҳон соғлиқни сақлаш ташкилоти 11 март куни COVID-19 коронавируси пандемиясини эълон қилди. ЖССТнинг сўнгги маълумотларига кўра, дунёда 820 мингдан ортиқ юқтириш ҳолатлари қайд этилган, 40 мингдан ортиқ одам вафот этган.