Бу ғалабадан кейин мусулмонларга қарши юришларга бошчилик қилган уч нафар таниқли киши Холид ибн Валид Махзумий, Амр ибн Ос Саҳмий, Усмон ибн Аби Толҳа Абдарийлар мусулмон бўлдилар. Пайғамбар алайҳис-салом уларнинг Ислом динини қабул қилганидан бениҳоя қувондилар. "Сени ҳидоят қилган Оллоҳга шукр, — дедилар у киши Холидга. — Сенинг ақлли одамлигингни билардим, фаҳму фаросатинг сени ҳидоятга етаклашидан умидвор эдим". Сарвари оламнинг самимий муомаласидан мутаассир бўлган Холид: "Эй расулуллоҳ, сенга қарши кўпгина жангларда қатнашдим, дуо қилгин, зора Оллоҳ Таоло гуноҳларимни кечирса", деди. Пайғамбар алайҳис-салом: "Ислом динида мусулмон бўлишдан аввалги гуноҳлар суриштирилмайди", дея уни хурсанд қилдилар.