АҚШ президенти Жозеф Байден Украина, Исроил ва Тайванга ҳарбий ёрдамни молиялаштирувчи қонунни имзолади.

Бугун, 24-апрел куни Америка Қўшма Штатлари президенти Жозеф Байден Украина, Исроил ва Тайванга ҳарбий ёрдамни молиялаштириш бўйича юқори даражадаги қонун лойиҳасини имзолади.

Бу ҳақда Америка етакчиси Х ижтимоий тармоғидаги расмий аккаунти орқали эфирга узатилган халққа мурожаатида маълум қилди.

Қонун Россия агрессиясига қаршилик кўрсатаётган Украинага 61 миллиард долларга яқин ҳарбий ёрдам ажратишни назарда тутади. Имзоланишни эълон қилар экан, Байден қурол етказиб бериш "яқин соатларда" қайта тикланишини таъкидлади.

Маълумки, ўқ-дорилар ва бошқа қуроллар Украина чегараларига олдиндан олиб келинган. Қўшма Штатлар Байденнинг ёрдам ўтказиш учун имзосини кутаётган эди ва у бу масалани кечиктирмади.

"Бу Америка учун яхши кун, европаликлар учун яхши кун, дунё учун яхши кун ва бу муҳим", - деди Америка раҳбари.

Унинг аниқлик киритишича, ҳарбий ёрдамнинг биринчи пакети украиналикларга зарур бўлган энг оддий нарсалар: ҳаво ҳужумидан мудофаа снарядлари, артиллерия, ракета тизимлари ва зирҳли техникаларни ўз ичига олади.

"Украиналиклар улкан армияга қарши туриб, ўзларини ниҳоятда жасорат билан ҳимоя қилмоқдалар. Уларнинг қилаётган иши ҳайратга солади. Америка Украинага улар жангни давом эттириши керак бўлган ёрдамни юборади. Яқин соатларда мен тегишли хизматларга буйруқ бераман. Ракета тизимлари ва барча зарур қуролларни топширишни бошланг... Бу пакет нафақат Украина хавфсизлиги, балки Европа хавфсизлиги учун ҳам сармоядир”, деди Байден.