"Япония Олимпия медаллари эйфорияси ва вирусдан қўрқиш тимсолида икки ўт орасида қолди, - деб ёзади журналист Мартин Келлинг. - Олимпия ўйинларига мезбон мамлакат жума куни ўзининг 17 олтин медалини қўлга киритганини нишонлаган бўлса, ҳукумат раҳбари Ёсихиде Суга коронавирус муносабати билан эълон қилинган фавқулодда ҳолат ҳудудини кенгайтирди. Келажакда ресторанлар кечқурун эрта ёпилиши ва спиртли ичимликларни сотишни тўхтатиши фақат пойтахт Токио билан чекланмайди – қўшни Канагава, Тиба ва Саитама префектураларида, шунингдек, Осака мегаполисида ҳам қаттиқ қоидалар қўлланилади".
"Коронавирус бўйича Япония экспертлар Кенгаши раиси Шигеру Оми бу қадамни аниқ асослаб берди. "Биз пандемиянинг ҳал қилувчи босқичидамиз, - деди у телевизион матбуот анжуманида. Олов ловуллаб ёнмоқда".
"Огоҳлантиришнинг сабаби Sars-Cov-2 вирусининг дельта варианти бўлиб, касалланиш суръатларининг янги рекордларга кўтарилишига сабаб бўлади", - дея таъкидланади нашрда. "Инфекция мисли кўрилмаган даражада, жумладан, пойтахт Токио минтақаси ва Осака минтақасида тарқалмоқда", - дейди Суга. Бу, унинг сўзларига кўра, ҳукуматни фавқулодда ҳолат ҳудудини кенгайтиришга мажбур қилади"
"Жума куни кетма-кет иккинчи кун давомида Японияда 10 мингта янги касаллик юқиш ҳолатлари қайд этилди. Аввалги максимал рақам 8 мингдан ортиқ ҳолат эди ва йил бошида, учинчи тўлқин пайтида қайд этилганди".
"Европага нисбатан бу рақамлар паст кўриниши мумкин. Аммо COVID-19 билан оғриган беморлар фақат давлат шифохоналарида даволаниши мумкин бўлган Японияда соғлиқни сақлаш тизимининг қулаши такрорланишидан қўрқувлар ўсиб бормоқда".
"Баҳорда, тўртинчи тўлқин пайтида, Осака мегаполисида бир неча ўнлаб одамлар уйларида вафот этди - уларга шифохонада жой топилмаган эди. Киото университетининг таниқли япон эпидемиологи Хироши Нишиуранинг айтишича, бошқа касалликлар ва фавқулодда беморлар ҳам клиника топишга қийналган".
"Эпидемиолог август ойида пойтахтда кунига 10 мингта янги коронавирус юқиш ҳолатлари аниқланишини тахмин қилмоқда, айниқса, ёш авлод ҳозир хавф остида. Шунинг учун у Олимпия ўйинларини ўтказишни дарҳол тўхтатишни талаб қилади", - дейилади мақолада.
"Токио мэри Юрико Коикэ ҳам вазиятга муносабат билдирди. Ўтган ҳафта у шифохоналарда бошқа бўлинмаларда коронавирус билан оғриган беморлар учун ўринлар бўшатиш ва операцияларни қолдиришни сўради. Бу Нишиура учун ёмон белги. "Қутқарилиши мумкин бўлган одамлар қутқарилмайди, - деб тахмин қилади эксперт. -Биз буни тиббий коллапс деб атаймиз"
"Фалокат сабабларини қидириш Японияда янги босқичга кирмоқда. (...) Лекин дўконларни ёпиш ёки уйда қолишга даъватлар ҳали буйруқдан кўра илтимосга ўхшайди", - дея қайд этади газета.
"Олимпия ўйинлари инфекцияни жуда кенг тарқатувчи воқеа сифатида баҳс марказидан ўрин олган. Ҳукумат раҳбари Суга жума куни жамоатчиликнинг қаршиликларига қарамай, пандемия пайтида Олимпия ўйинларига рухсат бериш ҳақидаги қарорини ҳимоя қилди. Бироқ, сўнгги ойларда ўтказилган сўровларда японларнинг ярмидан кўпи спорт шоусини бекор қилиш ёки кечиктириш тарафдори эдилар.
"Олимпиада ўйинлари касалликлар сони кўпайишининг сабаби эмас, дейди Суга. Унинг сўзларига кўра, спортчиларни изоляция қилиш уларнинг вирусни одамлар орасида тарқатишига тўсқинлик қилади. Бевосита Ўйинларга алоқадор бўлган одамлар орасида ҳозирча фақат 200 та COVID-19га чалиниш ҳолати қайд этилган ва улардан фақат бир нечтаси спортчилар билан боғлиқ".
"Бироқ, эпидемиологлар билвосита боғлиқлик борлигини таъкидлайдилар. Ҳозирги вақтда инфекциялар тўлқини ёш японлардан келади, улар Олимпия ўйинларидан илҳомланиб, яна тунда Токио барлари ва пабларига боришни бошладилар".
"Вирусга қарши курашда японларнинг ресурслари аста-секинлик билан тугамоқда. Суга одамларни доимо ўзларини вирусдан ҳимоя қилишга ва эмланишга чақирди. Бугунги кунга келиб, аҳолининг атиги 30 фоизи эмланган, улар орасида 65 ёшгача бўлганлар деярли йўқ", - деб ёзади Handelsblatt.
Манба: Handelsblatt
