Афғонистондаги «Толибон» ҳаракати етакчиси Мулла Охундзода у ёки бу сабаб билан мамлакатдан чиқиб кетмоқчи бўлганларни тинглашга ва муаммоларини ҳал қилишга уринишга чақирди.

Охундзода ҳокимлар, амалдорлар ва руҳонийларни Афғонистонни тарк етиш истагида бўлган фуқаролар билан бевосита гаплашишга ва уларнинг муаммоларига ечим топишга чақирди.

Унинг сўзларига кўра, сиёсий ёки иқтисодий сабабларга кўра болалар ва аёллар билан Ғарбга кетмоқчи бўлган афғонлар хавфсизлик, аҳлоқ ва гуманитар масалалар бўйича қатор муаммоларга дуч келади. Ғарб давлатларида бу одамлар нафақат ҳужжатларни сохталаштиришга, балки Ислом ва Исломий тузумга туҳмат қилишга ҳам мажбур қилинади, дейди «Толибон» раҳбари.

Охундзоданинг айтишича, мамлакатни тарк этганларнинг аксарияти мамлакат тараққиёти учун ўз касбий маҳоратидан фойдаланиш ўрнига Ғарб мамлакатларида қора ишларни бажаришга мажбур бўлмоқда.

"Афғонлар Ғарб йўлида ва қочқинлар лагерларида кўп қийинчиликларга дуч келади, Афғонистоннинг ҳар бир фуқаросини безовта қилади", - дейди у.

Шу билан бирга, Охундзода «Толибон» вакилларини мамлакатда хавфсизликни таъминлаш учун кўпроқ ҳаракат қилишга чақирди.