Нью-Йоркнинг Буффало шаҳридаги супермаркетда юз берган отишмада 10 киши ҳалок бўлди, 3 киши яраланди. Полиция ирқий сабабларга кўра жиноят содир етган 18 ёшли йигитни қўлга олди, деб хабар берди CNN.
CBS полициядаги манбасига таяниб ҳикоя қилишича, жиноятчи Tops Friendly Markets магазинига 14 май куни маҳаллий вақт билан 14:30 атрофида (Москва вақти билан 22:30) кирган. У ўқ ўтказмайдиган жилет ва дубулға кийган, милтиқ билан қуролланган. Шунингдек, жиноятчининг камераси бўлган ва у қотиллик содир бўлган жойдан тўғридан-тўғри видео трансляция қилган.
Буффало полицияси комиссари Жозеф Грамальининг сўзларига кўра, гумонланувчи машиналар тўхташ жойида ўт очган ва у ерда уч кишини ўлдирган, яна бир кишини яралаган. Шундан кейингина у супермаркетга кирган. У ерда нафақадаги полициячи қўриқчи бўлиб ишларди, у ҳужумчига бир неча марта ўқ узган, бироқ уни ўқ ўтказмайдиган жилет ва дубулға қутқариб қолган. Кейин отишмада қўриқчи ҳалок бўлган.
Грамальининг ҳикоя қилишича, гумонланувчи охир-оқибат магазин эшигига қайтиб келди ва полиция билан тўқнаш келди. У ўз бўйнига қурол тираган, бироқ хавфсизлик кучлари уни таслим бўлишга кўндирган ва ҳибсга олган.
CNN ёзишича, гумонланувчининг исми Пэйтон Гендрон, у отишма кейин айбланган биринчи даражали қотилликда ўзини айбдор деб тан олмайди. Суд йигитга суд-тиббий экспертиза тайинлади. Агар у айбдор деб топилса, муддатидан олдин озод бўлиш ҳуқуқисиз умрбод озодликдан маҳрум этилиши мумкин.
Эри округи прокурори Жон Флиннинг сўзларига кўра, Гендрон Буффалога Конклиндан келган – бу 3,5 соатлик йўл. Тахминларга кўра, гумонланувчи шаҳарнинг асосан афро-америкаликлар истиқомат қиладиган ҳудудига атайлаб йўл олган. Прокурор терроризм бўйича эҳтимолий айбловларни текшираётганини қўшимча қилди.
Расмийларга кўра, жиноятга ирқий адоват сабаб бўлган. "Биз бу ҳодисани нафрат жинояти ва ирқий сабабларга кўра зўравонлик экстремизми сифатида текширмоқдамиз", деди ФБР Буффало вакили Стивен Белонгиа матбуот анжуманида.
CBS манбаларига кўра, отишма чоғида гумонланувчи ирқчи сўзлар билан бақирган, бу сўзлар унинг қуролида ҳам ёзилган. Бундан ташқари, Гендрон Интернетда нафрат билан тўлдирилган ирқчилик тилидаги манифестни нашр этгани тахмин қилинмоқда.
Матбуот анжуманида расмийлар 13 қурбондан 11 нафари афро-америкалик эканини айтди.
АҚШ президенти Джо Байден "даҳшатли" отишмани қоралади. "Биринчи хоним ва мен қурбонлар ва уларнинг оилалари учун дуо қиламиз, бутун мамлакатнинг қалблари Буффало аҳолиси билан бирга", деб ёзган у.
