Россиянинг кенг кўламли босқини бошиданоқ эшитилган Украина ҳудуди осмонини ёпиш зарурлиги ҳақидаги расмий Киевнинг баёнотлари Ғарбда ҳам эшитилгандек. Қўшма Штатлар Украина томонига ўрта ва баланд баландликдаги ҳаво нишонларини уриб туширишга қодир Patriot зенит-ракета комплексларини топширишга тайёрланмоқда.

Бу тизимлар АҚШнинг Украинага 40 миллиард доллар миқдоридаги навбатдаги ҳарбий ёрдам пакетига киритилиши керак, деб ёзади The Washington Post.

Patriot ҳаво ҳужумидан мудофаа тизимидан ташқари, АҚШ Украинага юбориш учун узоқ масофага зарба берадиган артиллериянинг яна бир партиясини тайёрламоқда.

Янги пакет иқтисодий эҳтиёжларга сарфланадиган маблағларни ҳам ўз ичига олади. Озиқ-овқат муаммоларини ҳал қилиш учун 5 миллиард, мигрантларни қўллаб-қувватлаш учун 1 миллиарддан ортиқ маблағ ажратиш режалаштирилмоқда.

АҚШ Конгрессининг юқори палатаси (Сенат) Украинага 40 миллиард доллар миқдорида ёрдам пакетини маъқуллади. Тегишли қарор учун 86 сенатор овоз берди, 11 нафари қарши чиқди. Ҳужжатни АҚШ президенти Джо Байден имзолади.

Конгрессда айтилишича, янги ёрдам пакети Россия агрессиясига қаршилик кўрсатаётган Украина халқининг эҳтиёжларини қондиришга имкон беради. Patriot ҳаво ҳужумидан мудофаа тизими йирик маъмурий ва саноат марказларини, денгиз ва ҳаво базаларини ҳаво ҳужумларидан ҳимоя қилиш учун мўлжалланган. Тизим бир вақтнинг ўзида юздан ортиқ ҳаво нишонларини аниқлаш, шунингдек, ҳар бир нишонга учтагача ракетани йўналтириш имкониятига эга.

Урушнинг биринчи кунларидан бери Украина ҳукумати Ғарб ҳамкорларидан Украина осмонини Россия ракеталари ва самолётларидан ёпиш учун кучли ҳаво мудофаа тизимларини тақдим этишни сўрамоқда.