Украина Ҳарбий-денгиз кучлари ҳарбий хизматчиларининг биринчи гуруҳи Буюк Британияда учувчисиз сув ости дронлари билан ишлаш бўйича машғулотларни бошлади. Лондон уларни ҳарбий ёрдам доирасида Киевга беради.

Бу ҳақида 27 август куни Буюк Британиянинг расмий ҳукумат портали хабар берди.

Британия дронлари Украинага қирғоқ зонасини Россия миналаридан тозалаш ва Қора денгиз портини тўсишда ёрдам бермоқда.

Ҳаммаси бўлиб олтита учувчисиз тизимни етказиб бериш режалаштирилган: улардан учтаси Британия армиясининг омборларидан олинади, яна учтаси сотиб олинади.

Британия дронлари 100 метр чуқурликдаги сувларда ишлашга мўлжалланган. Уларда портловчи қурилмаларни кейинчалик утилизация қилиш учун аниқлаш ва жойлаштиришга қодир сенсорлар мавжуд.

Ўнлаб украиналик денгизчиларни Британия дронлари билан ишлаш бўйича ўқитиш режалаштирилмоқда. Курс тахминан 3 ҳафта давом этади. Дастурга, жумладан, АҚШ денгиз флотининг 6-флоти мутахассислари жалб этилади.

Буюк Британия Мудофаа вазири Бен Уоллес: "Ушбу муҳим жиҳоз Украинага сув ҳавзаларини хавфсиз қилишда, Киевга дон экспорт қилишда ёрдам беради ва Украина Қуролли кучларини ўз қирғоқлари ва портларини ҳимоя қилишда қўллаб-қувватлайди", деди.

Буюк Британия Қироллик денгиз флоти капитани Бен Викери украиналик денгизчиларни тайёрлашда иштирок этиб, уларнинг энг юқори профессионаллиги ва қатъиятини қайд этди. Унинг аниқлик киритишича, дастур доирасида улар "ақл бовар қилмайдиган ютуқларга эришган".

Қайд этиш жоизки, Буюк Британияда Украина ҳарбий-денгиз кучлари ҳарбий хизматчилари Sandown Mininehunter синфидаги кемаларни бошқариш бўйича ҳам ўқитилади.