Россия нефтига нарх чегарасининг жорий этилиши муносабати билан январ ойида Россиянинг нефть ва газдан тушган даромадлари учдан бирига қисқарди, деди Халқаро энергетика агентлиги (ХЭА) раҳбари Фатих Бирол. Унинг сўзларини 5 февраль, якшанба куни Reuters агентлиги келтириб ўтди.
ХЭА маълумотларига кўра, январь ойида Россия нефт ва газ сотишдан ўтган йилнинг шу даврига нисбатан 8 миллиард еврога кам даромад олган. Агентлик ҳисоб-китобларига кўра, даромаднинг пасайиши 30 фоизни ташкил этди.
Биролнинг сўзларига кўра, Россиядан нефть нархига ўрнатилган юқори чегара "нефть бозорларини барқарорлаштириш ва Москванинг экспорт даромадларини камайтириш" мақсадларига эришди. Хельсинки Энергетика ва тоза ҳаво тадқиқот маркази (CREA) таҳлилчиларига кўра, Европанинг Россия нефти импортини тақиқлаши ва Ғарб давлатлари томонидан жорий қилинган нархларнинг юқори чегараси Россияга ҳар куни 160 млн еврога тушади.
