Исроил қамалдаги Ғазо секторига 13-кун кетма-кет ҳаво ҳужумларини уюштиришда давом этмоқда, аҳоли эса сешанба оқшомида «ал-Аҳли ал-Араб» касалхонасига уюштирилган ҳаво ҳужумида ҳалок бўлган юзлаб одамлар учун мотам тутишда давом этмоқда.

Фаластиннинг "Wafa" агентлиги пайшанба куни эрталаб маълум қилишича, Исроилнинг Ғазо секторидаги турли аҳоли яшаш жойларига берган зарбалари натижасида ўнлаб фаластинликлар ҳалок бўлган.

Маҳаллий манбаларга кўра, Рафаҳга берилган ракета зарбалари оқибатида бир неча оиладан 30 дан ортиқ одам ҳалок бўлган ва яна кўп одамлар яраланган, улар Абу Юсуф Ан-Нажжар касалхонасига ётқизилган.

Исроил авиацияси Рафаҳдаги Ал-Масри минорасининг юқори қаватини ҳам бомбардимон қилди.

Маҳаллий манбаларнинг қўшимча қилишича, Хон Юнис ғарбидаги турар-жой биносини Исроил томонидан бомбардимон қилиши оқибатида бир фаластинлик ҳалок бўлган, 21 нафари яраланган.

Исроил ҳужуми АҚШ президенти Джо Байден Қоҳира ва Тел-Авив билан ёрдамга рухсат бериш тўғрисида келишувга эришганидан сўнг минглаб ғазоликлар Мисрдан тонналаб ёрдам кутаётган пайтга тўғри келди.

Чоршанба куни Байденнинг айтишича, Миср президенти Абдулфаттоҳ ас-Сиси жума кунидан бошлаб кучли бомбардимон қилинган Ғазо секторига "20 тагача юк машинасини ўтказишга" рози бўлиб, ҳукуматга йўлларни таъмирлаш учун вақт беради.

Ўтган ҳафта Исроил Ғазо секторини бутунлай қамал қилиб, ёқилғи, озиқ-овқат ва сув таъминотини тўхтатиб, халқаро ташкилотлар ва инсон ҳуқуқлари ташкилотлари томонидан қораланган эди.