Россия армиясининг Донецк вилоятидаги Авдеевка шаҳрини эгаллаш учун тинимсиз ҳужумлари мисли кўрилмаган миқёсга етди. Украина ОАВ ва Россия ҳарбий мухбирларига кўра, Авдеевка яқинида бир кун аввал содир бўлган воқеа дўзахни эслатарди. Маълум қилинишича, бу шаҳар учун бўлган жангларда рус армияси кўплаб ҳарбий техника ва шахсий таркибини йўқотган.
Украина қуролли кучлари ҳам жиддий йўқотишларга учради.
Авдеевка учун жанглар аслида 2014 йилдан бери давом этмоқда. Украина армияси шаҳар атрофида оғир мудофаа истеҳкомларини қурди ва 2022 йил феврал ойида бошланган кенг кўламли ҳарбий аралашувдан бери руслар шаҳарни эгаллашга бир неча бор, аммо муваффақиятсиз уринишлар қилди.
Гарчи баъзи ҳудудларда рус қўшинлари қанотлардан уюштирилган ҳужумлар натижасида бир неча юз метр олдинга ўтишга муваффақ бўлишса ҳам, ҳужумнинг ҳар бир куни руслар учун катта йўқотишлар билан якунланди.
19 октябрь куни Россия президенти Путин Ростовдаги жанубий ҳарбий гуруҳ қароргоҳига ташриф буюрганида рус армияси Авдеевка йўналишида катта миқдордаги кучларни жамлаган ҳолда янги ҳужумларни бошлади. Аммо улар ҳам руслар учун катта йўқотишлар билан якунланди.
Украина Қуролли Кучлари Бош штабининг ҳисоботига кўра, кеча Россия Қуролли кучлари ҳақиқатда рекорд даражада йўқотишларга дуч келди - 55 танк, 120 зирҳли техника, 1380 аскар. Ушбу йўқотишларнинг аксарияти Авдеевка учун жангларда содир бўлган.
Украиналик сиёсатчи Борислав Береза 19 октябрь куни Авдеевка яқинида содир бўлган воқеани ўзининг YouTube блогида изоҳлади.
«Кеча ҳақиқатан ҳам дўзах бўлди, - деб ёзган Береза. - Мен йигитлар билан гаплашдим, улар ҳеч қаерда, ҳатто Бахмут яқинида, ҳатто Запорожьеда ҳам бундай нарсани кўрмаганликларини айтишди. Руслар тўлқин ортидан тўлқин бўлиб ҳаракат қилишди. Улар ҳамма нарсани, умуман, ҳамма нарсани ишлатишди - танклар ва артиллерия, БТР ва БМП, «Град»лар, самолётлар, дронлар, ракеталар, пиёдалар ... Танклар шунчалик кўп эдики, энг кичик колонна бешта, максимал – ўттизта танкдан иборат эди. Улар келиб, позицияни эгаллашди ва отишни бошлашди. Бизнинг йигитлар эса уларни йўқ қилишди ... Жуда муваффақиятли равишда. Бу руслар томонидан бой берилган энг катта жанглардан бири. Гарчи улар буни ўзлари учун ниҳоятда муҳим деб билишса ҳам... Кеча йигирманчи-ўттизинчи танклар тўлқини кириб келганида, офицерлардан бири: "Бу нима, Курск ёйими", деди? (...) Бу (рус армиясининг ҳужуми) Киевни эслатди. Руслар зарба берувчи муштни йиғиб, Авдеевкага ташладилар, кейин бизнинг йигитлар ақл бовар қилмайдиган иш қилишди ... Бу жасорат. Бу имконсиз эди, лекин улар буни уддалашди".
Борислав Березанинг сўзларига кўра, Авдеевкага кечаги ҳужум 47-Магура бригадаси, 110-бригада, Украина Қуролли кучлари президентлик бригадаси ва бошқа бўлинмалар аскарлари томонидан қайтарилган. Шу билан бирга, Украина қуролли кучлари катта йўқотишларга дуч келди.
Бу ҳақида Россиянинг «Кремлевская табакерка» телеграм-канали шундай ёзади:
«Авдеевкада ҳақиқий даҳшат. Авдеевка йўналишида нималар содир бўлаётганини сўз билан ифодалаш қийин, у ерда ҳақиқий даҳшат. Бир неча кун олдин «Авдеевский террикон»ни қўлга олиш учун биринчи кенг кўламли уринишлар амалга оширилди, аммо улар муваффақиятсиз бўлди. Кеча бузиб ўтишга янги уриниш бўлди ва яна катта йўқотишлар бўлди".
Россия телеграм-каналига кўра, генераллар Путиннинг Ростов-Донга келиши муносабати билан уни хурсанд қилиш учун қўшинларни "гўшт ҳужумларига" юборган.
«Генераллар Путин келишини билишган ва унга совға тақдим этишга қарор қилишган, - деб ёзади «Кремлевская табакерка» Россия Қуролли кучлари офицерига таяниб. - Биз 2014 йилдан бери Авдеевка учун кураш олиб борамиз. Улар таъминотни тўхтатиш учун чиқиндилар уюмини олишга ҳаракат қилишди, лекин, афсуски, совға иш бермади. Ўлганлар жуда кўп. Биз ҳатто ҳисоблай олмаймиз. Вазият шу қадар оғирки, манбамизга кўра, босиб олинган Донецкдаги касалхоналар ва ўликхоналар тўлган. Бир кун ичида ҳарбий техниканинг йўқотишлари 40 тага баҳоланмоқда».
Россиялик генераллар Путинни яна ҳафсаласи пир қилди
Украина Қуролли Кучлари Бош қўмондони генерал Валерий Залужний жанглар пайтида фронт чизиғининг бир қанча участкаларида, жумладан Авдеевкада бўлди. Унинг шаҳарда бўлган вақтида тасвирга олинган видео Украина Қуролли кучлари Олий Бош Қўмондони расмий телеграм-каналида эълон қилинган.
Залужнийнинг сўзларига кўра, кесишув чизиғида енгил қисмнинг ўзи йўқ, фақат қийинроқ бўлганлар бор ва бу айнан Авдеевкадир.
"Россия қўшинлари мудофаани ёриб ўтиш ва шаҳарни ўраб олиш уринишларидан воз кечмаяпти", деди Украина Қуролли кучлари бош қўмондони.
Украиналик юқори мартабали ҳарбий офицернинг сўзларига кўра, Россия Қуролли кучлари ҳужум бўлинмалари, авиация, артиллерия ва кўп сонли зирҳли техникадан фаол фойдаланмоқда.
«Биз тезкор вазиятнинг доимий ўзгаришини ҳисобга олган ҳолда, Авдеевка йўналиши бўйича вазифаларни бажараётган бригадалар командирлари билан ҳаракатларимиз кетма-кетлигини аниқладик ва бўлинмаларнинг устувор эҳтиёжларини муҳокама қилдик», деди Залужний.
Жиддий йўқотишларга қарамай, 20 октябрь куни эрталаб рус армияси Авдеевка йўналиши бўйича ҳужумларни давом эттирди. Руслар барча ўт очиш воситаларидан, жумладан узоқ масофага отадиган артиллерия, оғир ўтсочар тизимлари ва самолётлардан фойдаланмоқда. Украина позицияларига ярим тонна ва бир тонна оғирликдаги ФАБ бомбалари ташланган. Зирҳли машиналар ва шахсий таркиб навбатдаги ҳужум учун қайта тўпланмоқда.
Баъзи рус манбалари Авдеевка қамал хавфи остида эканлигини хабар қилади. Шунингдек, Украина Қуролли кучлари Запорожье фронтидан Авдеевка ҳудудига қўшимча кучлар, жумладан ўнлаб "Леопард" танкларини ўтказгани ҳақида маълумотлар бор.
