Туркия Президенти Анталиядаги дипломатик форумда сўзга чиқди
Ғазо сектори халқаро тартиб банкрот деб эълон қилинган жойга айланди. Бу ҳақида Анталиядаги 3-дипломатик форумда сўзлаган Туркия Президенти Ражаб Тоййиб Эрдўған маълум қилди.
"Ғазо секторида нафақат болалар, аёллар ва тинч аҳоли шафқатсизларча ўлдирилди, балки миллиардлаб одамларнинг халқаро тизим, адолат ва қонунга бўлган ишончи йўқ қилинди", деди Туркия раҳбари.
У Ғазо секторида содир бўлаётган воқеалар "уруш эмас, балки геноцид қилишга уриниш" эканлигини таъкидлади."
Унинг сўзларига кўра, бирдамлик, адолат ва ишонч каби асосий тушунчалардан маҳрум бўлган ҳозирги халқаро тизим ўзининг минимал функцияларини ҳам бажара олмайди.
"Кутилганлардан фарқли ўлароқ, 21-аср инқирозлар даврига айланмоқда, қоидаларга асосланган халқаро тартиб ўз маъносини йўқотмоқда ва шиордан бошқа нарса саналмайди", — деди Туркия президенти.
Давлат раҳбарининг қўшимча қилишича, Ғазодаги босқиннинг биринчи куниданоқ Исроилни сўзсиз қўллаб-қувватлаган Ғарб давлатлари "иккиюзламачилик сиёсати туфайли қон тўкилишига шерик"дир.
Эрдўған, пойтахти Шарқий Қуддус бўлган мустақил Фаластин давлатининг ташкил этилиши Фаластин муаммосини якуний ҳал этишнинг ажралмас шарти эканлигини таъкидлади. Унинг сўзларига кўра, Туркия бу борада масъулиятни ўз зиммасига олишга, жумладан, кафолат беришга тайёр.
"Халқаро ҳамжамият Фаластин халқи олдидаги қарзини фақат Фаластин давлати тузилгандан кейингина тўлайди", - дея таъкидлади у.
Президент Эрдўған халқаро ҳамжамиятни "Ғазо ва Фаластин масаласини чин дилдан қўллаб-қувватлашга" чақирди.
Давлат раҳбари Ғазода гуманитар ёрдам учун навбатда турган фаластинликларни Исроил ҳарбийлари томонидан ўққа тутилишини "тинч аҳолига қарши қаратилган қабиҳ ваҳшийлик" деб атади.
Президент Ғазо секторида тинч аҳоли қурбонлари сони ортганини ҳам қайд этди.
"Исроилнинг тинч аҳоли нишонларига атайлаб уюштирган ҳужумлари натижасида шу кунгача 30 000 ғазолик, асосан болалар ва аёллар ҳалок бўлди. 70 мингдан ортиқ фаластинлик тан жароҳати олди, 2 миллионга яқин одам ўз уйини ташлаб кетишга мажбур бўлди", — деди у.
Давлат раҳбари Эрдўғанни ҳозирги вазиятдаги "заифлик ва функционал эмаслик" учун танқид қилди.
"Биз халқаро институтлар, жумладан, глобал тинчликни, Европа Иттифоқи ва бошқаларни таъминлаш масъулияти бўлган БМТ Хавфсизлик Кенгаши нақадар заиф ва самарасиз эканига гувоҳ бўлдик", - деди у.
Туркия раҳбари, шунингдек, бутун дунёда ирқчилик, исломофобия ва ксенофобия кучайиб бораётганидан хавотир билдирди.
"Ирқчилик, исломофобия ва ксенофобия дунёнинг кўп жойларида вабо каби тарқалмоқда", деди у.
Туркия президенти Ғазодаги инқирозни бартараф этиш ва бошқа глобал муаммоларни ҳал қилиш йўлларини излашда дипломатиянинг муҳим ролига эътибор қаратди.
"Яхши ният, ирода ва қатъият бор жойда дипломатия ва мулоқотда олға силжиш мутлақо мумкин", - деди Президент Эрдўған.
Туркия дунёда содир бўлаётган воқеаларни четдан кузата олмаслигини таъкидлади. "Халқимиз ва бутун инсоният олдидаги бурчимиз ҳақиқатни ва ўзимиз тўғри деб ҳисоблаган нарсани гапиришдир", деди Эрдўған.
Унинг сўзларига кўра, бугунги кунда Туркия жаҳон миқёсида диққат марказида бўлиб, унинг мавқеи инобатга олиниб, инқироз ва можароларни ҳал қилишда мамлакат асосий роль ўйнайди.
Сўнгра Туркия президенти Анқаранинг халқаро терроризмга қарши курашга қўшган ҳиссасига тўхталди. Унинг эслатишича, Туркия "террорчи ташкилот ИШИДга қарши "ерда курашган" ва уни мағлуб етган ягона НАТО иттифоқчисидир".
Президент Туркиянинг мудофаа саноатидаги муваффақиятларига ҳам тўхталди. Туркиянинг бешинчи авлод қирувчи самолёти KAAN нинг муваффақиятли илк парвози туфайли Туркия бу соҳада янги босқичга кўтарилди", деди у.
