Телеграм асосчиси Павел Дуров Париждаги Ле Бурже аэропортида қўлга олинди, деб хабар берди Франциянинг TF1 телеканали.

Франция ҳаво транспорти жандармияси ходимлари Дуровни Озарбайжондан келган шахсий самолётидан тушганидан сўнг дарҳол қўлга олди.

900 миллион кишилик аудиторияга эга мессенжер яратган Дуровга нисбатан Франция Миллий суд полицияси департаменти томонидан ордер чиқарилган. У ҳибсга олинган.

Ҳуқуқ-тартибот идоралари Дуровни гиёҳванд моддалар савдоси, болалар порнографиясини тарқатиш ва фирибгарлик каби оғир жиноятларга шерик сифатида тан олишга интилмоқчи, чунки Телеграм хавфсизлик кучлари билан ҳамкорлик қилмаган ва ўз платформасида модерациядан ўтказмаган. Дуров 20 йиллик қамоқ жазосига ҳукм қилиниши мумкин.

Бойлиги 15 миллиард долларга баҳоланган Дуров 2021 йилда паспортини олган Франция фуқароси сифатида ҳибсга олинган. У Францияда исталмаган одам эканлигини билар эди, дейди TF1 манбаси. Шунинг учун Дуров БААда, собиқ СССР ва Жанубий Америка мамлакатларида бўлишни афзал кўрди ва Телеграм ишлайдиган мамлакатлардан қочиб, Европада кам саёҳат қилди.

TF1 манбасига кўра, Дуров «албатта» ҳибсга олинади. «У ўз платформасида ҳеч нарса қилмасдан ёки [ҳуқуқни муҳофаза қилиш органлари билан] ҳамкорлик қилмасдан, сон-саноқсиз қонунбузарликлар ва жиноятларнинг содир бўлишига йўл қўйди», деди манба.

Франция разведка хизматлари Телеграмдаги шифрланган ёзишмаларга киришни хоҳлайди. «Телеграм – жиноятчилар уяси. Терроризмдан ташқари, энг хавфли жиноятчилар Телеграмдан болалар порноси билан алмашиш учун фойдаланадилар», — деди терговчилардан бири.

Шунингдек, «ВКонтакте» ижтимоий тармоғининг асосчиси бўлган Дуров 2014-йилда фойдаланувчи маълумотларини Россия махсус хизматлари билан гўёки бўлишишдан бош тортгани учун Россияни тарк этган эди.