Кўплаб Чехия фуқаролари ушбу ёдгорликнинг Прагадан олиб ташланишини ёки ҳеч бўлмаганда Россия элчихонаси ҳудудига кўчирилишини талаб қилишди. Сўнгги йилларда унга бир неча маротаба саналар ёзиб кетилган: 1956, 1961, 1968. Конев бошчилигидаги Совет қўшинлари Венгриядаги қўзғолонни бостирган, 1961 йилда Берлин инқирози пайтида Конев Германияда Совет кучлари гуруҳига бошчилик қилган. 1968 йилда СССР ва яна тўртта социалистик мамлакат Чехословакияга қўшин юборди, уларни Прага баҳори деб номланган сиёсий либераллаштиришни тўхтатишга мажбур қилди.
