«Коллектив келишув бўйича умумийликни инобатга олсак, Путин доим кескин можароларни ҳал қилишда воситачи бўлишга тайёр. У буни бир неча марта кўрсатган ҳам. Ҳозирча эса дипломатик мулоқот воситасида эришилган ўқ отишни тўхтатиш бўйича келишувни қўллаймиз», деган Песков.

29 апрел куни Тожикистон-Қирғизистон ўртасидаги чегара можароси яна тўқнашувларга айланиб кетди. Унда ҳарбийлар ҳам аралашди. 150 дан ортиқ одам жабрланди, 20 киши ҳалок бўлгани маълум. 29 апрел куни кечга яқин томонлар ўқ отишни тўхтатишга келишиб олди, лекин тунда чегарада яна ўқ овозлари эшитилган.

Узоқ йиллардан буён тинчимаётган чегара можароси бу гал «Бош» сув тақсимлаш станциясини талашиш оқибатида келиб чиққан. Тожикистон станцияга электр узатиш устунларига кузатув камераларини ўрнатгани Қирғизистон томонига ёқмаган. Фуқароларнинг ўзаро бир бирига тош отишидан бошланган можаро кейинчалик қуролли тўқнашувга айланиб кетди.