Германия социал-демократик партияси (ГСДП) раҳбари Олаф Шольц мамлакатнинг янги федерал канцлери етиб сайланди. Аввалроқ Германия Молия вазири лавозимини эгаллаган сиёсатчи Бундестаг овоз беришнинг биринчи турида аллақачон қўллаб-қувватланишни таъминлади.

Бундестаг раиси Бербел Бас раислигида ўтказилган яширин овоз бериш чоғида Шолцнинг номзодини 707 депутатдан 395 нафари қўллаб-қувватлади. 303 депутат Шолц номзодига "қарши" овоз берди, 6 депутат бетараф қолди ва уч овоз ҳақиқий эмас, деб эълон қилинди.

Шундай қилиб, 63 ёшли Шольц Германиянинг янги федерал канцлерига айланди. Янги канцлер президент Франк-Вальтер Штайнмайердан тайинланиш ҳақида ҳужжатни олиш учун президент қароргоҳи Бельвю қароргоҳига боради, шундан сўнг қасамёд қабул қилиш учун Бундестагга қайтади.

Германиянинг собиқ канцлери Ангела Меркел овоз бериш жараёнини трибунадан туриб кузатди, чунки у Бундестаг депутати саналмайди.

Бундестаг раисини олқишлагандан сўнг депутатлар Меркелни карсаклар билан кузатиб қўйишди.

Бундан ташқари, трибуналарда Германиянинг собиқ президенти Йоахим Гаук, собиқ бош вазир Герхард Шредер, Шолцнинг турмуш ўртоғи - Бритта Эрнст, шунингдек, бошқа яқин қариндошлари бор эди.

Шольц 2007-2009 йилларда меҳнат ва ижтимоий ишлар вазирлигини бошқарган. 2011-2018-йилларда сиёсатчи Гамбург федерал ерида бургомистр лавозимини, 2018-2021 - йилларда эса вице-канцлер ва Молия вазири лавозимини эгаллаган.