Рўза 30 кун давом этади. Алмати бош имоми Толеби Оспан Минтақа коммуникациялар хизматида ўтказилган брифинг чоғида келгуси ой ҳақида батафсил маълумот берди.  "Бу йил муқаддас ой 1 апрелда қуёш ботиши билан бошланади ва 1 майда тугайди. Эртаси куни, 2 май куни имонлилар ҳайит байрамини нишонлайдилар. Бу йил фитр садақасининг ҳажми 500 тенге. Рамазон рўза ойидир. Бу нафақат овқатланиш ва ичишдан, балки гуноҳ ва ёмонликдан ҳам воз кечиш даври", деб тушунтирди Толеби Оспан.

Алмати бош имомининг сўзларига кўра, бугунги кунда барча шаҳар масжидлари муқаддас Рамазон ойи бошланишига тайёр. Бу йил шаҳардаги 52 масжиддан 47 тасида таровиҳ намозларида Қуръон ўқиш амалга оширилади. Бундан ташқари, Муқаддас ой давомида Алмати масжидларида намоз ва Қуръон курслари ўтказилади. "Марказий масжид ҳудудида ҳар куни ауызашар (ифтор) ўтказиладиган Рамазон чодири ўрнатилади. Чодир 500 кишига мўлжалланган. Мўминлар учун овқат бошқа барча масжидларда ҳам ташкил этилади", - дея давом этди Толеби Оспан.

«Казинформ» хабар қилишича, брифинг давомида Рамазон ойида шаҳар кўчаларида 100 минг порция сув ва хурмо тарқатиш бўйича акция ўтказилиши маълум қилинган. Тадбирда ёшлар етакчилари ва имомлар бошчилигидаги блоггерлар иштирок этади. "Яқинларга совға бер" ва "Жарапазан" эстафеталари ҳам ўтказилади. Рамазон ойининг биринчи куни жума намозидан сўнг шаҳар масжидларида мўминлар учун рўза тутишга доир савол-жавоблар акцияси ўтказилади.