Янги йилни нишонлашда ҳеч қандай диний тақиқ йўқ, одамлар байрамларда бир-бирларини хурсанд қилишлари керак. Бу ҳақда Россия мусулмонлари диний идораси раиси, Россия муфтийлар кенгаши раиси муфтий Равил Гайнутдин РИА Новостига маълум қилди.

“Муфтий, диний арбоб ва мамлакат фуқароси сифатида айтишим мумкинки, биз яқинлар ва дўстларни хурсанд қилишимиз керак. Шунинг учун мен ҳамюртларимни биз амалда яшаётган Григориан тақвимига кўра Янги йил билан табриклайман. Инсонлар бир-бирларига, айниқса болаларга совға улашишда қандайдир тақиқни кўрмаяпман”, - дейди муфтий.

Диний арбобнинг сўзларига кўра, ислом динига эътиқод қилувчилар мусулмон тақвимига амал қилишлари билан ажралиб туради, бироқ улар ўз давлатларида Григориан тақвимини ҳам ҳисобга олади.

"Бунда мураккаб нарса йўқ. Мусулмонларнинг янги йили келганда, дин талаб қилганидек, Қуръон ўқиймиз, Григориан Янги йили келганда эса бир-биримизга совғалар берамиз", - дея хулоса қилди муфтий.