Ҳозирда Истанбул прокуратураси яҳудий давлатининг Туркиядаги махсус хизматлари фаолиятини текширмоқда.
Полиция ходимлари 33 киши Исроил фойдасига жосусликда гумон қилиниб ҳибсга олинган, дея хабар беради TRT Haber телеканали.
Канал маълумотларига кўра, операция саккиз вилоятда амалга оширилиб, гумонланувчиларнинг аксарияти Истанбулда ҳибсга олинган.
Ҳозирда Туркия мегаполиси прокуратураси Исроил разведка хизматларининг Туркиядаги фаолиятини текширмоқда. Яҳудий давлатига ишлашда гумон қилинган 46 кишини ҳибсга олиш тўғрисида ордер берилди. Қайд этилишича, улар чет эл фуқароларини кузатган ва уларни ўғирлаш режаларини тузган.
33 кишининг ҳибсга олиниши 57 манзилда амалга оширилди. Яна 13 кишини қидириш давом этмоқда.
"Истанбул Бош прокуратураси томонидан олиб борилган тергов доирасида саккиз вилоятда Моссад фойдасига жосуслик қилганликда гумон қилинган 33 киши ҳибсга олинган. 46 кишига қарши ҳибсга олиш тўғрисида ордер берилди, қолганлари ҳали ҳам қидирилмоқда", - дея хабар беради агентлик.
Туркия ички ишлар вазири Али Ерликая декабрь ойида Исроил разведкасининг Туркиядаги Хамас раҳбарларига қарши ҳар қандай ҳужумлари қабул қилиниши мумкин эмаслигини ва бундай воқеа содир бўлган тақдирда Исроилга "қимматга тушиши"ни айтганди.
Таъкидланишича, Моссад Туркиядаги чет эл фуқароларини таъқиб қилиш, ҳужум қилиш ва ўғирлаш бўйича операцияларни режалаштирган.
Барча Исроил дипломатлари, шу жумладан элчи, 19 октябрь куни Туркияни тарк этди, деди аввалроқ турк дипломатик манбаси. 4 ноябрь куни Туркия ташқи ишлар вазирлиги Ғазо секторидаги воқеалар фонида маслаҳатлашувлар учун Тел-Авивдаги элчи Шакир Торунларни Анқарага чақириб олиш қарорини эълон қилди. Исроил ташқи ишлар вазирлигининг таъкидлашича, Туркиянинг қарори Анқарани Хамасга янада яқинлаштиради.
Аввалроқ Американинг Wall Street Journal газетаси Исроил расмийларига таяниб, Исроил махсус хизматлари Ғазодаги уруш тугаганидан кейин бутун дунё бўйлаб Фаластин Хамас ҳаракати раҳбарларини йўқ қилишга тайёрланаётганини ёзган эди.
Хусусан, Ливан, Туркия ва Қатарда яшовчи Хамас раҳбарларини кузатиб бориш режалари ишлаб чиқилмоқда. Ҳозирда Исроил Ғазодаги ҳаракат раҳбарларини қўлга олиш ва йўқ қилиш устида ишламоқда.
