Бундай марказларда бошпана топган 30 мингга яқин одам Исроил зарбаларининг нишонига айланди

Исроил армияси Ғазо секторининг жанубидаги Хон Юнис шаҳридаги 5 та бошпанада жойлашган 30 минг кўчирилган одамларни нишонга олди.

Бу ҳақида Ғазо ҳукумати матбуот хизмати баёнотида айтилган.

Матбуот хизматининг эслатишича, аввалроқ Исроил расмийлари ушбу марказлар хавфсиз деб даъво қилишган ва Фаластинликларни у ерда бошпана олишга чақиришган.

Ғазо расмийларига кўра, «Ақсо» университети, «Холидия» ва «Ал-Меваси» мактаблари биноларидаги бошпаналар, хусусан, Исроил армияси томонидан тўғридан-тўғри ҳужумларга учраган. Берилган зарбалар натижасида кўплаб ҳалок бўлганлар ва ярадорлар бор.

Баёнотда таъкидланишича, Исроил Фаластин халқига, биринчи навбатда бошпанадаги одамларга қарши барча жиноятлар учун жавобгардир.

Ғазо ҳукумати жаҳон ҳамжамиятини урушни тугатиш учун шошилинч чоралар кўришга чақирди.