ФИФА 2030 ва 2034 йилларда бўлиб ўтадиган футбол бўйича жаҳон чемпионатлари мезбонларини тасдиқлади.
2030 йилдаги чемпионат Марокаш, Португалия ва Испанияда ўтказилади. Шунингдек, Уругвай, Парагвай ва Аргентинада ҳам учта ўйин бўлиб ўтади. 2034 йилги жаҳон чемпионати эса Саудия Арабистонида ўтказилади.
Ушбу ҳолатда мезбонлик учун тақдим этилган аризалар рақобатсиз бўлиб, ғолиб давлатлар ягона номзод сифатида танланди.
Эътиборга лойиқ жиҳати, 2030 йилги жаҳон чемпионати биринчи чемпионатнинг 100 йиллигига тўғри келади, у 1930 йилда Уругвайда ўтказилган эди. Эслатиб ўтамиз, 2026 йилги чемпионат АҚШ, Канада ва Мексикада ўтказилади.
