Магдебургда содир этилган теракт бўйича суриштирувда ноодатий ҳолат аниқланди: уни Саудия Арабистонидан қочқин сифатида келган ва Германиядаги ислом таъсирининг ортишига қарши чиққан исламофоб психиатр амалга оширган. У Германиядаги «Германия учун альтернатива» партиясини қўллаб-қувватлаган.
Немис ОАВ хабарларига кўра, 50 ёшли врач Талеб Жавад Ал-Абдул Муҳсин 2006 йили Германияда қочқин мақомини олган. У исломга танқидий муносабати туфайли таъқиб қилингани сабабли мамлакатга келган ва Магдебург яқинидаги Бернбург шаҳарчасидаги шифохонада психиатр сифатида ишлаган. Газета Die Weltнинг хабар беришича, у судланган шахслар учун реабилитация марказида ҳам фаолият юритган.
Аль-Абдул Мухсин ижтимоий тармоқларда ва маҳаллий ОАВда ўз сиёсий қарашларини фаол тарғиб қилган. У Германияни «суриялик экстремистларни қўллаб-қувватлагани» учун танқид қилган ва ўзини каби исломга қарши фикрда бўлган шахсларга ёрдам берилмаётганидан хафа бўлган. У шунингдек, «Ислом Германияни забт этди», деб афсусланган.
2019 йили Frankfurter Algemeine Zeitung газетасига берган интервьюсида Талеб Жавад ўзини «Тарихдаги энг агрессив ислом танқидчиси» деб атаган. «Бу мен учун таҳдид эди, шунинг учун мен Германиядан бошпана сўрашга қарор қилдим. Саудия Арабистонига қайтганимда, мени ўлдиришни исташарди», — деган у.
Бу шахс Германияда қочқин мақомини олишни истаган саудиялик аёлларга ёрдам бериш учун онлайн платформа яратган. У ҳукуматни қочқинларнинг ҳаётини «улар мамлакат ичкарисида ёки ташқарисида бўлса ҳам барбод қилиш»да айблаган. У ижтимоий тармоқларда Германияни «Европани исломлаштириш»да айблаб, Ангела Меркелнинг фотомонтажини чоп этган, унда Меркелнинг плакатда «Мен Европани йўқ қилдим» деб ёзилган сўзлари бўлган.
Wall Street Journal маълумотларига кўра, 7 октябрдан кейин Аль-Абдул Мухсин ижтимоий тармоқларда Исроилни қўллаб-қувватловчи постлар ҳам чоп этган.
Таҳлиллардан маълум бўлишича, саудиялик психиатрнинг Германиянинг қочқинлар ва ислом бўйича сиёсатидан норозилиги уни теракт уюштиришга ундаган. У ижарага катта BMW автомобил олиб, Магдебург марказига йўл олган. У ерда мэрия яқинида рождество бозори ўтказилаётган бўлган. У полиция томонидан майдон атрофида ўрнатилган ўткир тўсиқларни катта тезликда бузиб ўтган ва 400 метрлик узун йўлакда кўплаб одамларни босиб ўтган.
