Ғарб давлатлари умумий ҳисобда Россия Федерациясининг 500 миллиард долларлик активларини музлатиб қўйди. Украина ушбу активларни Украинани қайта тиклаш учун мусодара қилиш бўйича халқаро келишувни қўллаб-қувватламоқда.
Бу ҳақида Украина бош вазири Денис Шмигал брифингда маълум қилди, деб ёзади "nv.ua".
Унинг сўзларига кўра, Украинани қайта тиклаш учун юзлаб миллиардлар керак бўлади ва бу пулни Украина солиқ тўловчилари ёки ҳамкор давлатлар эмас, балки фожиа содир этганлар тўлаши керак.
"Агрессор бунинг бадалини тўлаши керак ва унинг маблағлари бизнинг кенг кўламли қайта тиклашимиз учун асосий ресурсга айланади", деди Украина ҳукумати раҳбари.
