Россия президенти Владимир Путин Донецк, Луганск, Херсон ва Запорожье вилоятларининг босиб олинган ҳудудларини аннексия қилиш бўйича "шартномалар"ни имзолашдан олдин нутқ сўзлаб, Украина раҳбариятини "ҳарбий ҳаракатларни зудлик билан тўхтатиб, музокаралар столига ўтиришга" чақирди, шунингдек, Россия босиб олинган ерни "барча мавжуд воситалар билан" ҳимоя қилишини айтди.

Путиннинг Кремлнинг Георгиевский залидаги нутқи Россия телеканаллари орқали намойиш этилди.

Россия диктаторининг сўзларига кўра, Донбасс, Херсон ва Запорожье вилоятларининг босиб олинган ҳудудларида яшовчи одамлар гўёки "абадий Россия Федерацияси фуқаросига айланади".

Бундан ташқари, Кремл раҳбари яна бир бор Россия ядро қуролидан фойдаланиш еҳтимолига шама қилди. Ўз нутқи давомида у "дунё тартибининг иккиюзламачилиги ва ёлғонлиги" ҳақида гапирди, шунингдек, Қўшма Штатларни Хиросима ва Нагасаки атом бомбалари пайтида ядро қуролидан фойдаланиш бўйича прецедент яратишда айблади.

Қолган маънода, Путиннинг нутқи аввалги чиқишларидан деярли фарқ қилмади. У яна Кремлнинг барча асосий ривоятларини такрорлади, хусусан, у коллектив Ғарбни "Россияни йўқ қилиш" ниятида айблади ва Россия Федерацияси "ўзининг анъанавий қадриятларини сақлаб қолиш учун курашаётганини" таъкидлади.

Путин n-марта Совет Иттифоқининг парчаланиб кетганидан зорланди, бу воқеани "фожиа" деб атади, лекин шу билан бирга Россия гўёки СССРни тиклашга уринмаслигини ишонтиришга ҳаракат қилди.

Путиннинг нутқидан сўнг у ва босиб олинган ҳудудлар раҳбарлари бу ерларни Россияга "қўшиб олиш" ҳақидаги ҳужжатларни имзолади. Энди ушбу "келишувлар" Россия парламентининг иккала палатаси - Давлат Думаси ва Федерация Кенгаши томонидан тасдиқланиши керак.