АҚШ президенти Дональд Трамп бошлаган савдо урушида Хитой мағлуб бўлмайди — у бундай тўқнашувни енгиб ўтиш имкониятига эга. Бу ҳақда Dragonomics таҳлил компанияси тадқиқотлар директори Артур Кребер Financial Times газетасидаги мақоласида маълум қилган.



Унинг таъкидлашича, АҚШ ҳукумати “хитойча меркантилизм”ни енгиш учун коалиция тузишга уринмоқда, лекин бу режа амалга ошмайди.



«Нима учун шундай бўлишини тушуниш учун, аввал Трамп божлар орқали нимага эришмоқчи эканини англашимиз керак», — дейди таҳлилчи.



Креберга кўра, бу ерда асосий мақсад — куч тўплаш ва уни ишга солиш. Божлар бу борада энг қулай восита ҳисобланади, чунки, биринчидан, Трамп бошқа давлатлар АҚШ бозорига кириш учун ҳар қандай нархни тўлашга тайёр, деб ишонади; иккинчидан, у ҳар қандай давлатга, исталган вақтда, исталган миқдорда тариф жорий қилиш ҳуқуқига эга.



«Трамп, энг аввало, ўз устунлигини намойиш этмоқчи ва итоатга эришмоқчи. Божларга қарши чиқа олмаганларга муддат берилди, қаршилик қилган давлатлар эса қаттиқ жазоланди», — деб таъкидлайди эксперт.



Бироқ, Кребернинг фикрига кўра, кўплаб давлатлар Трамп маслаҳатчилари таклиф этган “иқтисодий мантиқ” аслида фақатгина намоиш эканини англаб етган. Шу сабабли, АҚШнинг бу урушда мағлуб бўлишининг биринчи сабаби — мамлакатнинг “ишончсизлиги” бўлган.



Иккинчи сабаб эса — Трамп “ўзаро божлар” ғоясидан воз кечгани. Бундай қарор молия бозорларининг манфий реакцияси билан боғлиқ.



«Натижада Трамп музокаралардаги таъсир кучини йўқотди. У яна тарифларни ошира олмайди, чунки АҚШ давлат облигациялар бозори қайта исён кўтаради», — деб тушунтиради таҳлилчи.



Учинчи сабаб — Хитойнинг ўзи. Кребер Хитой ҳозир АҚШга нисбатан ёмон аҳволда эканини тан олади, бироқ у иқтисодий етишмовчиликка асосланган урушга яхши тайёрланган.



Унинг айтишича, Пекин АҚШ бозоридаги йўқотилган талабни ички истеъмол орқали қоплай олади, шунингдек, АҚШдан импортсиз яшашни ўрганган — экспорт назорати йиллари унга АҚШ технологияларисиз маҳсулот ишлаб чиқаришда улкан ютуқларга эришиш имконини берган.



«Агар Трампнинг Хитойга қарши янги савдо урушидаги мақсади — Пекинни АҚШ қудрати олдида тиз чўктириш бўлса, натижа фақат хафалик ва руҳий тушкунлик бўлади», — дея хулоса қилади Кребер.

Абу Муслим тайёрлади